På Mi side kan du som pasient svare på kartleggingar, sjå kalender og kommunisere med oss.
Digital kartlegging før ankomst hjelper både pasientar og behandlarar å førebu seg til opphaldet. Tida på rehabiliteringsinstitusjon vert betre utnytta, og behandlinga kan bli individuelt tilpassa.
Det siste året har Røde Kors Haugland Rehabiliteringssenter teke fleire store steg på vegen mot digital samhandling med pasientane under heile pasientreisa.
Framtidas rehabilitering
Sidan 2021 har RKHR vore med på å utvikla og testa den digitale samhandlingsplattforma saman med journalleverandør Carasent Norge AS. Plattforma er tett integrert med journalsystemet Ad Curis, der all informasjon om pasientbehandling elles er samla.
Pilotprosjektet om digital samhandling er teke vidare til det større utviklings- og innovasjonsprosjektet «Framtidas rehabilitering».
I dag brukar vi den digitale samhandlingsplattforma AdVoca til kartlegging av pasientar i alle team. I denne løysinga kan data både oppstå, lesast og skrivast mellom ulike partar i behandlinga, og deretter samlast for rapportering, analyse og vidare bruk (t.d. i forsking).
Nivå-4-tryggleik gjer det mogleg å formidla sensitive opplysningar. Den digitale samhandlingsplattforma kan bidra til å setja pasienten i sentrum av eigen behandlingsprosess. Ho gir òg moglegheit til digital oppfølging etter opphaldet.
No er grunnlaget lagt, og framover vil vi fokusera på å implementera den fulle breidda i plattforma i organisasjonen. Dette arbeidet inngår òg i vårt langsiktige mål om å etablera eit kvalitets- og forskingsregister.
Du kan lesa meir om digital samhandling ved å klikka her.
App for barn og ungdom
I 2023 har vi òg teke i bruk ein eigen app for digital samhandling med barn og unge. I samarbeid med selskapet Adfectus har vi utvikla vår versjon av appen, der barn og unge kan formidla kva forhold dei har til våre aktivitetar på førehand.
Dei kan òg gå på ei virtuell omvising på senteret og få praktisk informasjon om til dømes kva dei skal pakka når dei kjem til oss.
