Ville meistre kvardagen med fatigue
Kvinna fortel at det ikkje er lett når ein ikkje maktar det same som før. Å komme seg igjennom kvardagen kunne slite henne ut.
Fatigue, denne følelsen av trøyttheit og mangel på energi, er noko mange kreftpasientar opplever etter endt behandling.
«Rehabiliteringsopphaldet vart starten på ein prosess»
– Tidlegare pasient
For å lære og takle denne utfordringa, bestemte pasienten og fastlegen seg for å søke om eit rehabiliteringsopphald ved RKHR.
Balansere kvardagen
Kvinna fortel om den gode hjelpa ho har fått frå dei tilsette ved RKHR, og at ho har ho fått auka kunnskap og gjort seg erfaringar på korleis ho skal takle fatigue.
Gjennom tilpassa fysisk aktivitet, kognitiv terapi og kvile, har ho erfart korleis ho kan balansere kvardagen.
Målet hennar var å kunne meistre kvardagen utan å bli utslitt. Då er det viktig, men ofte vanskeleg å avgrense seg sjølv. Ho understrekar at det er viktig å ta pausane ein treng.
Møtte andre brystkreftpasientar
Det hadde og stor betydning for henne å møte andre brystkreftpasientar, som forstår kva ein har vore gjennom. – Det er godt å le saman, på tross av det alvorlege ein har opplevd, fortel kvinna.
Rehabiliteringsopphaldet er starten
Rehabiliteringsopphaldet er starten på ein prosess, og ho føler seg mykje betre rusta for kvardagen etter opphaldet. Ho veit at det kjem til å ta tid, men ser og framstega ho allereie har gjort.
No ønsker den tidlegare pasienten å gje håp til andre kreftpasientar som opplever seineffektar som fatigue. – Med god hjelp frå fagfolk kan det faktisk bli betre, avsluttar ho.