Parkinson

Vi tilbyr tre vekers døgnopphald for deg som har Parkinsons sjukdom. Opphaldet er gruppebasert, og inngår i ei større pasientgruppe med andre diagnosar.  

Vi jobbar for å gi deg positive opplevingar ved å bruke eigen kropp aktivt, og vi ynskjer at du får starta ein god prosess som kan vidareførast når du kjem heim. 

Dette får du hos oss

Her på Haugland får du intensiv oppfølging av eit tverrfagleg team med brei kompetanse innan rehabilitering. Teamet har fokus på dine ressursar og mål, og vi ser på deg som den viktigaste aktøren i din rehabiliteringsprosess.  

Vi legg til rette for tilpassa fysisk aktivitet, og har godt tilrettelagte fasilitetar både ute og inne. Ved Parkinsons sjukdom har vi og trening etter LSVT-Big konseptet, samt gruppetimar med vekt på mimikk og stemmetrening.  

Når du kjem på gruppeopphald møter du andre pasientar i same situasjon, der de saman kan utveksle erfaringar og tileigne dykk ny kunnskap. Vi har eigne gruppesamlingar leia av fagstab, retta mot det å leve med Parkinson sjukdom.  

Undervisninga inneheld og element frå kognitiv terapi, eit verktøy for å forstår meir om tankane du har om det som skjer med deg og kroppen din. Vår erfaring er at dette er eit ekstra nyttig verktøy når livet er i endring, og ein gjerne må handtere ein kvardag som vil sjå annleis ut enn før. 

Kvifor velgje oss?

Røde Kors Haugland Rehabiliteringssenter har lang erfaring med gruppeopphald ved Parkinson sjukdom. Vi har stor breidde i fagkompetanse, og fleire av våre tilsette er med i ParkinsonNet.  

Vi har pasientrom tilpassa ulike funksjonsnivå og vi er i stadig utvikling for å vere mest mogleg universelt utforma. Senteret ligg vakkert til mellom fjord og fjell, og har gode forhold for turar, friluft og naturopplevingar. 

Vi erfarer at mange personar med Parkinsons sjukdom har stort utbytte av eit intensivt rehabiliteringsopphald. Kan hende er dette ei god investering også for deg og for din veg vidare.  

Vi har ei eiga side for praktisk informasjon, og ei anna side som omhandlar søknad. Er det utover det noko du eller dei rundt deg måtte lure på, må de gjerne ta kontakt med oss for nærmare informasjon.